كونك نموذج للست الشاطرة حافظى علي سلامك النفسى

كتبت / هند البحيرى

هتحلوى لو حبيتى الخير للغير

هتحلوى لو بقيتي علي مسافه بعيده عن العلاقات التوكسيك وان محدش يكون ضاغط عليكي طول الوقت..

هتبقى احلي لو اكلتي اللي يعجبك ولبستي اللي يعجبك..

هتبقي اجمل لو اتصرفتي تصرفات شيك تدل علي انك برنسيس وبنت ناس..

هتبقي جميله اوووي بقي لو مانتظرتيش حاجه من حد وتعملي كل حاجه بنفسك..

هتحلوي لو راجعتي نفسك باستمرار علي كل افعالك اللي فاتت و عاتبتيها عتاب صغنن وكملتى طريقك و ماوقفتيش ودخلتي نفسك في سكك لوم ووجع قلب وتأنيب ضمير..

ساعدي اللي حوليكي بس مش بكل طاقتك علشان تقدرى تسيبي شويه طاقه لنفسك..

انتظرى القدر وانتي عارفه وراه لطف وربنا بيدينا الحمل علي قد الكتف اللي بيشيل..

خلي الاولويه لشكلك وشكل زوجك واولادك وانك تراعي ربنا فيهم..

 احفظي سرك ومتقوليش دى صحبتي دى عشرتي دى جارتي دى اختي علشان محدش يعرف نقط ضعفك ويلعب عليها وعلي مشاعرك..

 اتعففي من فتن التكنولوجيا وخلي ليكي مبدا ومفيش حاجه اسمها ده زي اخويا مفيهاش حاجه لما احكيله وانا اسمعله..

 دورى انك تعملي مشروع صغير في حاجه انتي بتحبيها ومتكونش واخده وقتك كله..

 اقرائي كتاب كل اسبوع عالاقل وتابعي مسلسل واحد فقط..

 حافظي علي اسرار غيرك حتي لو غيرك ماقالش ان ده سر..

اعرفي ان مفيش ضمان لاي علاقه علي وجه الارض علشان احنا في زمن الفتن والمصالح..

حافظي علي صلاتك واذكارك..  وعلمي اولادك وربيهم زي ما اتربيتي يبقوا عارفين الفرق بين الحلال والحرام…