كتبت: هند البحيرى
في مجتمعنا الشرقي زمان وجهات نظر مختلفة ولكنها راسخه حتي الان.. بالرغم من تطور الاحداث والمواقف والمجتمع ككل…. في ثوابت في وجهات النظر دي بالرغم انها غلط مابنقدرش نغيرها ولو مر عليها سنين…
كلنا كنا بشوف ان الست الشاطرة هي اللي بتغزل برجل حمار وده مثل شعبي قديم جدا ولكن مورث في عقولنا… و نضرب له تعظيم سلام…
كان زمان يقولوا دي ست بيت شاطرة اصلها نضيفه اووي و مدبره و بتحط القرش علي القرش علشان توفر لجوزها ده جوزها بني العمارة وعندها ارض اصلها مش مصرفه…
دي شاطرة علشان بتفاصل مع البياع و تاخد منه بنص التمن وبيكون راضي ومبسوط وهو بيقولها خديها ياست وجعتيلي راسي ويديها الباقي كمان…
دي اللي عايشة في بيت عيلة و بتصحي الفجريه تخبز العيش و تقلع في الارض مع جوزها….
هي الست اللي لما تمر بازمه ف تقلع دهابها وتقول لجوزها ما انت اللي جايبه ليا……. والخ بس ممكن بكلمة منها توقع قرية باكملها وتكون ماتعرفش يعني ايه صله رحم و لا ترابط..
هي دي بقى نموذج الست الشاطرة في نظر المجتمع طيب تعالوا اقول لكم بقى مين هي الست الشاطرة من وجهه نظري انا…. وخصوصا لو بنت اصول..
الست الشاطره من وجهه نظري هي الست الذكية اللي بتقدر تكسب علاقات كل اللى حواليها تقدر تبقى علاقتها حلوه بجيرانها علاقتها حلوه باصدقائها علاقتها حلوه بأهل الزوج وتكون بارة بأهلها واهم حاجه عندها هى صله الرحم..
بتسمع للكبير و بتسمع للصغير لما حد يزعلها بكلمه بتقدر تفوت تقدر تمشي امورها من غير ما حد يحس بيها بتتغافل يعني بمعنى أصح ما بتاخدش الامور كلها على اعصابها تتغافل مره وتتجاهل مره واهي ماشيه بس وقت الجد ااوي بتعرف تجيب حقها بكل ذووء.
الست الذكيه دي بتكسب الدنيا كلها اللي بيكون وشها بشوش ومصاحب لوشها ابتسامه حلوه وبتساعد كل اللي حواليها وبتحاول تطيب بخاطر الناس وما بيطلعش من لسانها كلمه مؤذيه لحد ولو حد اذاها في مره خلاص بتدخل و بتقفل الباب وما بتفتحهوش ثاني…
بتفضل ساكته حتى ممكن ما بتردش عليه العمر كله صدقوني الست الشاطرة هي الست الذكيه زي ما قلت تكسب كل اللي حواليها اللي تضيف ليهم و لنفسها..
هي اللي نزلت تشتغل وسط 100 راجل تفضل محافظه علي نفسها وعامله حدود وتعرف ترد وقت اللزوم..
بلاش نربط بين ان الست تكون نضيفه او مرتبه او مدبرة بأنها شاطرة وغيرها لا..
في ناس شاطره بس في حاجات تانيه خالص..
