افهم احتياج طفلك
بقلم د. إسراء اسامه الطماوي
(( ازيك يا مس اخبار ميدو ايه معاكي ؟؟ مغلبني في البيت ومش بيكون جمله صح وعلى طول شقي ومش عارفه اذاكرله.
( معلمة شاطرة في التدريس لكن مش فاهمه حالات صعوبات التعلم) : والله يا مامة ميدو هو صعب اوي وشقي وبيضرب زمايله وانا مقعداه في البانيش كورنر ومنعته يلعب معاهم في البريك..
((…
ابنك او بنتك بيعانوا من حاجه من دول؟؟
ضعف الثقه.. تهتهة… قلة الدفاع عن النفس.. حركات غريبه ( رفرفة بالايدين او لف حوالين نفسه ) .. سلوكيات غلط.. مشاكل بالدراسة
..
الحاجات دي كلنا معرضين نشوفها في اولادنا واول ما نلاقي الطفل اتلعثم أو أتأخر في الكلام ، كل المحيطين يقولولنا بكره هيتعدل لوحده.
او
نزليه حضانه..
صح ، ينزل بس لازم ينزل حضانه تكون بتعتمد على تنمية المهارات ومعالجة المشكلات مش مجرد حضانة.
وهنا بنقول لازم تفهم احتياج طفلك عشان تقدر تلبيه
الطفل المتلعثم او قليل الكلام بيكون متعصب لانه مش قادر يعبر عن نفسه
العصبيه دي ممكن تظهر في شكل عنف وعدوان ع الاشياء المحيطة أو الأشخاص
وممكن تظهر في شكل صريخ
او فرط حركة
لو ابنك مش قصاد متخصص وفاهم هيتعرض لأساليب لاسكاته و نهيه عن اللي بيعمله فيها قمع … و ده هيزود المشكله مش هيحلها.
الطفل في الحضانه ومع الاختلاط اه ممكن يتقدم
لكن مشاكله هتفضل موجوده ولو اتحلت هيكون ببطء شديد
بالتالي ، مش بيلحق يحصل اللي فاته واللي جاي بسرعة تعينه على التواصل الدراسي
..
وهنا في حالة ميدو
ميدو هيقضي باقي سنين عمره الدراسية في البانيش كورنر وممنوع يلعب في البريك
..
في مامي قالتلي مره: انا ابني بقاله خمس سنين بياخد تاسيس فقط ومش بياخد المناهج اللي عماله تجري وتزيد علينا.
في فيلم هندي تربوي جميل اوي للرائع عامر خان اسمه
Taare Zameen Par
او نجوم على الأرض
كان بيحكي عن طفل بيعاني من Dyslexia
( ديسلكسيا او تعثر القراءة)
وفضل منبوذ لدرجة باباه أصر يبعده عن الاسره ويعلمه في مدرسة داخلي إلى أن ظهر معلم الرسم ( عامر خان) واتعامل بفهم مع حالة ( الطفل ايشان) وكان سبب في تحول ( ايشان) من طفل منبوذ ضايع بيكره نفسه والدراسه وأسرته لطفل موهوب كل الناس بتكرمه على موهبته.
هنا تحضرني الآية الكريمه
( وَمَنْ أَحْيَاهَا فَكَأَنَّمَا أَحْيَا النَّاسَ جَمِيعاً )
ابنك ينزل حضانه بس مكان ينمي مهاراته العقليه والنمائية لتنمو المعرفية والدراسية
د. إسراء اسامه الطماوي
استشاري إدارة منشآت تعليمية
رئيس اللجنة لشئون التدريب بمبادرة الجيل القادم الدولية بجمهورية مصر العربية
محاضر استراتيجيات التعلم وطرق التدريس
حواديت_تربوية
